Þessi ostakaka er virkilega ljúffeng. Frábært að skreyta hana með fullt af ferskum berjum þegar hún er borin fram.
Kakan geymist í kæli í nokkra daga án berja, svo það er alveg óhætt að baka hana aðeins fram í tímann, ef það hentar.
ATH - munið að leggja kasjúhneturnar fyrir fyllinguna í bleyti í 2 klst áður en baksturinn hefst.
Botninn
75g haframjöl
100g malaðar möndlur
10 döðlur, smátt skornar
60g kókosolía
1/2 tsk sjávarsalt
Fyllingin
150g kasjúhnetur, lagðar í bleyti í 2 klst
200g vegan rjómaostur
250g kókosmjólk
225g agavesíróp
2 msk sítrónusafi
2 msk kókosolía
2 msk maizenamjöl
1 tsk vanilludropar
1/2 tsk sjávarsaltflögur
Ofan á
fersk ber, t.s. hindber, bláber eða jarðaber
súkkulaðihnetusmjör, heimagert eða tilbúið
EÐA sulta í staðinn fyrir hnetusmjörið.
Botninn
Setjið allt hráefnið í matvinnsluvél og maukið þar til þetta verður að klístruðu deigi.
Þjappið niður í smurt form sem er um 26 cm í þvermál. Gott að nota smelluform.
Forbakið við 160°C í 10 mín.
Látið kólna áður en fyllingunni er hellt yfir.
Fyllingin
Hellið vatninu af kasjúhnetunum.
Setjið allt hráefnið í blandara og blandið þar til silkimjúkt. (Hægt að nota matvinnsluvél).
Hellið fyllingunni yfir forbakaða botninn og bakið við 160°C í 55 mín.
Látið kólna í a.m.k. 2 klst í kæli, en má geyma í kæli í nokkra daga þess vegna.
